135
0
جهل مركب - حكي شعري
بقلم : محمود مصطفى هلال- مصر
أنا لا بسيط.. ولا شيخ بيتزاهد
ولا ماسك سيف.. ولا طاغي وبيجاهد
لا بمدح الظالم ولا بسجد لباطل صريح
ولا بمشي خلف اللي في الطعنات بقى واحد
أنا بدافع بحرقة دم مغلية
عن سنة الهادي ونفوسنا النقية
مش للمنافق صاحب الفتوى اللي بالتكفير
بيتاجر بدينه كأنه سلعة عصرية!
أنا مش كافر.. ولا راهب في صومعته
ولا جندي تابع لوهم الدم في جماعته
أنا اللي شايف بياض الحق متغطي
بتكفيري جاهل.. عمي واتفرقت شيعته!
أنا اللي فاهم بأن الدين دعاء ورحمة
مش سيف بيجرح بلاد مليانة بالزحمة
مش جلد ظهر العباد ولا هدم الأوطان
ولا راية سودة بتسرق في عموم العتمة!
يا اللي بتطلق رصاص التكفير على الهوا
وأنت اللي قاتل ونفسك ما فيها دوا
هو الدين بقى سجن وقفل وقيود؟
ولا رحمة لعالم بينشد سوا؟
هو ربك مالك الملك العظيم؟
ولا صنم صنعتوه للفكر السقيم؟
ليه بتخاف من سؤال طفل بسيط؟
وتشهر سيفك وتعلن رأيك الغشيم؟
فين الأرض اللي كانت للغريب حضن؟
وفين بيت الجار اللي كان في الشدة أمن؟
فين الخير اللي كان سيله كما الفيضان؟
ولا خلاص باعوه في المزاد بالثمن؟
فين النور اللي في العقول مكتوب؟
وفين العدل اللي مشى بصدقه شعوب؟
ولا بقينا أرقام في دفتر المزادات؟
والظلم حاوطنا من كل الجروب؟
حرر فلسطين قبل ما تقول الخطاب
حرر عراق المجد من غدر الذئاب
رجع لسوريا العزيزة عطر الياسمين
ولليبيا ضحكة صفية فوق التراب
قبل ما تقتل باسم جهاد مزعوم
بص في عيون الخاين المحتوم
قبل ما تقيس الخطى ع الميزان
شوف الميزان اللي سبناه مهدوم!
التطرف مش صحيح الدين بتاعنا
ولا الإرهاب كان قرآن ربنا السامعنا
ولا الدم شرع الحبيب والقتل رحمة
ولا الظلم عنوان لدين جمعنا
التطرف هو الإرهاب العقيم
هو اللي بيحرق بلاد كانت نعيم
بيزرع في جوف القلوب ألف خراب
وتدي سلاحك لجاهل ظالم لئيم!
مصر المحروسة أبدا مش للبيع
ولا سماها تطاطي لغدر الخديع
ولا تسيب حقها للي خانوا التراب
ولا تركع لراية جاية بالتضييع
مصر صلبة.. صوتها دايما عالي
مهما اتجمعوا الجبنا في الليالي
مش هتسيب دينها للي باعوا العهود
ولا هتخاف من سيف الموت الزوالي
أنا مش هسكت ولا هطاطي راسي للغمام
ولا هبيع حقي لو كان الثمن كلام
أنا لسان الأرض وهي بتصرخ بأعلى صوت:
فين الحق في زماننا.. وفين السلام؟!
